Серіктес мекеме — М.Қойшыбаев атындағы балалар саз мектебімен бірлесе, ағымдағы жылдың 25 ақпан күні колледжіміздің Домбыра пән бірлестігінің оқытушысы Қазиев Артур Бержанұлының туған жері Қызылқоға ауданының орталығы Миялыда “Алтын ұям — ауылым!!” атты шығармашылық кеш үлкен табыспен өтті.
📌Шараға М.Қойшыбаев атындағы балалар саз мектебінің ұстаздарынан құрылған, өзі жетекшілік жасап, дирижер болып еңбек ететін халық аспаптары оркестрі қатысты.
🟢Кеш қонақтары — Артур Бержанұлының ұстазы “Құрмет” орденінің иегері, Қазақстанның мәдениет қайраткері, профессор С.Садықов және Халықаралық, Республикалық конкурстардың лауреаттары Б.Сарсенов, Ж.Базарбаев, Ғ.Тұрғалиевтар сахнада өнер көрсетіп, қолдау көрсетті. Концертте оркестрдің орындауында халық, шетел және қазіргі заман композиторларының классикалық үлгідегі шығармалары орындалды.
🔵Сонымен бірге, кеш иесі концертте дирижерліктен бөлек домбыра, шертер аспаптарында оркестрмен қосылып орындап өзінің жан-жақты маман екендігін байқатты. Шарада Қ.Артурдың отбасы да өз үлестерін қосып, жары Флора және Ораз есімді ұлы оркестрмен қосылып ән шырқап өз өнерлерін ортаға салды. Сазгер ретінде өзін тәрбиелеп өсірген ата-әжесінің рухына арналған “Сағыныш” атты күйі көрермендердің көңілінен шығып, риза сезімге бөледі. Өнер адамының кіндік қаны тамған, туған жеріне келіп концерт беруі кейінгі өскелең ұрпаққа үлгі боларлық іс деп айтуға толық болады.
✅Концерт соңында сөз алған аудан әкімінің орынбасары Г.Нәдірқызы, М.Қойшыбаев атындағы балалар саз мектебінің директоры С.Альмуханова және аудандық мәдениет бөлімі мен “Арман” мәдениет үйінің басшылары өздерінің ризашылық сезімдерін білдіріп, сый-сияпатпен гүл шоқтарын ұсынды. Осындай шаралар алдағы уақытта да жалғасын тапсын деген тілекпенен кеш мәресіне жетті. Құтты болсын!