Кез келген орындаушының, мейлі ол аспапшы немесе вокалист болсын, шығармашылық жетістігінде концертмейстердің атқаратын рөлі ерекше. Концертмейстер – жеке орындаушыны терең сезіне білетін, оның музыкалық болмысын түсініп, онымен шығармашылық тұрғыдан біртұтас үйлесім табатын музыкант. Атырау музыкалық колледжінің (бұрынғы училище) тарихында педагогикалық қызметті концертмейстерлік жұмыспен қатар алып жүріп, кәсіби шеберлігімен танылған көптеген пианистің есімі сақталған.
Әр жылдары колледжде өз ісінің шеберлері еңбек етті. Олардың қатарында Б. М. Коновалова, В. А. Вагнер, Е. В. Белоножкина, Л. Просвирнина, В. Ургарчева, В. А. Подзвездова, Т. Портнова, Г. Б. Ишханова, К. А. Богосьян, Г. С. Булекбаева, О. В. Поплевина, А. Т. Шинбаева, Г. М. Садуахасова, Е. Н. Каргина, Ж. Г. Овсепьян, В. В. Шмелева, Т. Колесник, Т. Б. Соколова, Г. Бекмаганбетова және Н. Исенбаева бар. Колледжде 2006–2024 жылдар аралығында еңбек еткен А. Е. Сыздыкова да концертмейстер ретінде ұжымның шығармашылық дамуына зор үлес қосты.
Колледж тарихындағы жаңа кезең 2015 жылдан бастау алды. Колледж директоры, өнертану ғылымдарының кандидаты Г. М. Садуахасованың бастамасымен Атырау музыкалық колледжінде алғаш рет концертмейстерлердің пәндік-циклдік комиссиясы (ПЦК) құрылды. Пәндік-циклдік комиссияны ұзақ жылдар бойы үрмелі және ұрмалы аспаптар бөлімінде концертмейстер болып қызмет атқарған, сондай-ақ «Міндетті фортепиано» пәнінің оқытушысы Ж. Г. Овсепьян басқарды.
Бүгінде пәндік-циклдік комиссия құрамында көпжылдық тәжірибесі бар білікті концертмейстерлер – А. А. Ереулиева, Н. Ж. Козырь, О. У. Ференс, Е. В. Мартиросьянц және О. А. Давыдова еңбек етуде. Сонымен қатар ұжым қатарына кәсіби даярлығы жоғары жас мамандар Г. М. Манарбекова, Л. А. Кенжегарина, Д. Алпамыс және Д. Н. Зинетов қосылып, шығармашылық ортаға тың серпін беріп келеді.
Концертмейстердің күнделікті кәсіби қызметі сабақтардан, дайындықтардан, емтихандардан, концерттер мен байқаулардан тұрады. Сонымен қатар концертмейстерлердің пәндік-циклдік комиссиясы белсенді әдістемелік жұмыс жүргізіп, ашық сабақтар өткізеді, баяндамалар дайындайды және педагогикалық оқуларда өз тәжірибелерімен бөліседі. 2015 жылдан бастап колледж басшылығының қолдауымен концертмейстерлік шеберлікке арналған «Музыкалық палитра» фестивалі тұрақты түрде өткізіліп келеді. Фестиваль аясында концертмейстерлер жеке орындаушыларды өздері шақырып, мазмұнды әрі сан қырлы концерттік бағдарламаларын ұсынады.
Пәндік-циклдік комиссия ұжымы кәсіби біліктілігін үнемі жетілдіріп, Астана, Алматы, Ростов-на-Дону, Астрахань және Санкт-Петербург қалаларындағы жетекші жоғары оқу орындарында ұйымдастырылатын шеберлік сабақтарына қатысу арқылы тәжірибе алмасып келеді. Пианистердің кәсіби шеберлігі қалалық, облыстық, республикалық және халықаралық байқауларда үнемі дәлелденіп, олардың шәкірттері лауреат және дипломант атанып жүр.
Колледждің барлық концертмейстерлері еңбектері үшін құрмет грамоталары мен дипломдармен марапатталған. Ал А. Е. Сыздыкова мен Е. В. Сулиев «Алаш ұстазы» медаліне ие болған.
Концертмейстер – кәсіби шеберлікті, терең музыкалық білімді және адам жанын түсіне білуді бойына тоғыстырған ерекше маман. Ол бір мезгілде тәлімгер, психолог әрі сенімді серіктес бола біледі. Сахнаға шығар алдындағы соңғы ақыл-кеңесін айтып, орындаушыға рухани демеу беретін де – осы концертмейстер. Ал санаулы сәттерден кейін ол жеке орындаушымен бірге шығармашылық еңбектің қуанышын бөлісіп, музыкалық туындының көркемдік тұтастығын қалыптастыруға өз үлесін қосады.
